Cospeito (Lugo), 10 de abril de 2026
A conselleira do Medio Rural, María José Gómez, participou hoxe na inauguración da XLII Mostra Exposición de Muimenta (Moexmu), onde reafirmou o seu compromiso cos produtores lácteos galegos ante a baixada do prezo en orixe por parte das industrias, unha baixada que cualificou de “inxustificada”. Neste senso, asegurou que desde a Consellería estanse revisando todos os contratos para certificar que non hai incumprimentos e así protexer os produtores. Explicou que calquera indicio de irregularidade que se detecte, tanto nos contratos como na entrada de leite doutros países, remitirase á Comisión Galega da Competencia e, no seu caso, ás autoridades nacionais deste mesmo ámbito, se é necesario.
De feito, cómpre lembrar que xa se abriron unha vintena de expedientes e seguirase traballando nesta liña, co fin último de garantir un equilibrio na cadea de valor do leite e o cumprimento estrito da normativa. A maiores, lembrou que se sigue esixindo ao Goberno central a súa implicación neste asunto e que actúe “con contundencia”, asegurando que se cumpra a Lei da cadea alimentaria e se mellore esta norma. “Está en xogo o futuro do noso rural”, salientou.
Concretamente, entre as melloras que se solicitan, destaca a necesidade de modificación da Lei para que estableza un sistema de cálculo dos custos de produción e mellore a súa eficacia coa publicación dun índice trimestral. A súa vez, se considera necesario actualizar o Paquete Lácteo para garantir que os produtores cubran os seus custos de produción no caso de acumular máis de 3 meses consecutivos de perdas, e que poidan rexeitar ofertas por razóns de prezo. Demándase tamén establecer a prórroga automática dos contratos en ausencia de acordo. Ademais, a conselleira insistiu en que se segue reclamando unha reunión co ministro de Agricultura para abordar esta cuestión, unha reunión solicitada hai xa case un mes.
Sobre a Moexmu
A conselleira destacou no comezo desta nova edición da Moexmu o papel que desempeña como dinamizador económico e social para a comarca da Terra Chá. Asegurou que a súa celebración contribúe a xerar oportunidades, dinamiza negocios e dá vida ao territorio e, en definitiva, apoia á fixación de poboación.
Por iso, recalcou que desde o Goberno galego manterase o apoio a este tipo de eventos nos que se pode comprobar o nivel de profesionalización do sector e tamén a calidade da cabana gandeira da nosa comunidade. Ademais, a conselleira enxalzou novamente o traballo que desenvolven os gandeiros galegos a prol do desenvolvemento e modernización do noso sector primario, e que desde o Goberno galego se apoia, por exemplo, con axudas para favorecer a remuda xeracional. Neste sentido, pediu tamén corresponsabilidade ás industrias neste asunto, dado que con esta renovación dos contratos están poñen en perigo, precisamente, esta remuda.