Carballeda de Avia (Ourense), 10 de setembro de 2025
A conselleira de Vivenda e Planificación de Infraestruturas, María Martínez Allegue, reuniuse hoxe con veciños afectados polos lumes no concello ourensán de Carballeda de Avia. Xunto á directora territorial da Consellería en Ourense, Pilar Fernández, visitou o núcleo de Vilariño, e deu conta á veciñanza das liñas das axudas activadas pola Xunta en materia de vivenda.
Compromiso do Goberno Galego
Allegue insistiu no compromiso do Goberno galego para axilizar “coa máxima celeridade” a tramitación destas achegas, a fin de que as persoas afectadas poidan comezar canto antes a recuperación dos fogares. A conselleira lembrou que as axudas da Xunta poden acadar case 150.000 € no caso de vivendas habituais. Isto inclúe 132.000 € para a rehabilitación do inmoble, aos que se poden engadir 16.200 € polo enxoval doméstico. En caso de segunda residencia, as axudas son de ata 66.000 € e 5.400 € para o enxoval.
Suporte e axuda económica
Ademais, o Goberno galego tamén asumirá o 100 % do alugueiro temporal, se é preciso, e achegará ata 600 € máis para sufragar gastos de aloxamento provisional, transporte ou mudanza. Os afectados poderán percibir a contía total da axuda de xeito anticipado, o que lles permitirá axilizar obras de rehabilitación das vivendas.
Asistencia a damnificados
Todas as persoas damnificadas teñen á súa disposición o número de teléfono 012 e o persoal do IGVS, e tamén nas 16 oficinas despregadas nas zonas afectadas poden resolver todas as súas dúbidas.