Lugo, 17 de abril de 2026
A conselleira do Medio Rural, María José Gómez, acompañada polo director da Axencia Galega da Calidade Alimentaria, Martín Alemparte, participou hoxe na presentación da Memoria de 2025 do Consello Regulador da Agricultura Ecolóxica de Galicia (Craega). Durante o evento, salientou que o valor económico deste tipo de produción certificada se triplicou na última década.
No pasado ano, o Craega acadou un valor estimado de máis de 118 millóns de euros, fronte aos pouco máis de 40 millóns de 2016, e tamén superior aos 111 millóns de 2024. A conselleira destacou que, con esta cifra, séguese consolidando a tendencia á alza dos últimos anos, o que evidencia o grande potencial deste tipo de elaboracións que apostan polo respecto ao medio ambiente e pola sustentabilidade en xeral.
Ao longo da última década, o Craega incrementou en máis dun 40 % o número de produtores, chegando a 1.005 o pasado ano, e nun 72 % o número de industrias comercializadoras, alcanzando as 273. Este aumento é un reflexo do crecemento da superficie inscrita no consello regulador, que xa supera as 46.600 hectáreas, distribuídas principalmente nas provincias de Lugo e Ourense.
A titular de Medio Rural reafirmou que en Galicia se aposta claramente pola agricultura e a gandaría ecolóxicas, en liña coas políticas europeas a prol da sustentabilidade. Neste sentido, Agricultura Ecolóxica é un dos 38 selos de calidade diferenciada recoñecidos na comunidade, dos cales 36 son denominacións de orixe e indicacións xeográficas protexidas, sumándose o distintivo de Artesanía Alimentaria.
Apoio á promoción
María José Gómez destacou que unha das prioridades do Goberno galego é fortalecer este tipo de produccións de calidade, especialmente relevantes para a economía de Galicia e, en particular, para o rural. Para isto, subliñou o desenvolvemento de iniciativas como o Plan Saborea Galicia Calidade Diferenciada, cun orzamento de 10 millóns de euros, dúas millóns máis que no ano pasado.
Mediante esta iniciativa, explicou a conselleira, apóiase a participación de produtores galegos en eventos como o Salón Gourmets, que se celebrou esta mesma semana, ao mesmo tempo que se organizan propostas propias en Galicia para dar a coñecer estes produtos dentro da comunidade.