Santiago de Compostela, 23 de abril de 2026
A Xunta investirá máis de 50.000.000 € no desenvolvemento do ámbito de Mallou, en Santiago de Compostela. Ademais, prevé un investimento inducido de 600.000.000 € para a creación dun novo barrio para 8.000 persoas. A conselleira de Vivenda e Planificación de Infraestruturas, María Martínez Allegue, xunto ao secretario xeral de Vivenda e Urbanismo, Heriberto García Porto, presentou hoxe o Proxecto de Interese Autonómico (PIA) para a cidade, que é o sétimo que tramita a Xunta e que acada a aprobación inicial.
Allegue puxo en valor a aposta da Xunta pola vivenda en Santiago, cidade na que neste 2026 se entregarán as primeiras vivendas da lexislatura en Lamas de Abade e O Castiñeiriño. Este anuncio consolídase co proxecto aprobado inicialmente no PIA en Mallou, onde se desenvolverá solo para a construción de 3.609 vivendas, do cal o 80% delas estarán protexidas. «Un futuro próximo barrio para esta cidade», sinalou Allegue, «un proxecto para facilitar o crecemento desta cidade polo norte, ao carón da zona urbana xa existente».
A conselleira destacou o deseño do proxecto, que distribúe a superficie do ámbito en cinco grandes mazás, separadas por unha rede viaria estruturante, xerando un eixo norte-sur e amplas zonas verdes de carácter natural en torno ao cauce do río Mallou, afluente do Sar. Dentro de cada unha delas, ordénanse cuarteiróns menores que albergarán vivendas, equipamentos públicos e zonas verdes.
As 3.609 vivendas, que darán continuidade á actual trama urbana, distribuiranse en bloques de varias alturas, que irán desde 3 até 9 pisos, incluíndo un edificio de 13 alturas.
En canto ás zonas verdes, ocuparán máis de 130.000 m², con máis de 3.500 árbores e itinerarios para fomentar a mobilidade sostible. Tamén, 45.290 m² destínanse a espazos para equipamentos, que se situarán maiormente na periferia do sector, facilitando o acceso á poboación do contorno.
Allegue incidiu en que o ámbito contará cunha praza central na contorna da fonte-lavadeiro de Mallou, que incorporará o camiño antigo do río, buscando a mellor integración dos elementos existentes que forman parte da memoria da veciñanza do lugar.
Mobilidade sostible
O proxecto busca unha mobilidade urbana sostible, definindo vías estruturantes para tráfico fluído e viarios de proximidade que inclúan espazos ajardinados e amplas beirarrúas pensadas para a convivencia. Incorporarán un carril bici e espazos para o transporte público.
Prevese que o número de prazas de aparcamento sexa algo máis de 3.500, das cales preto de 900 serán públicas.
Ademais, a urbanización permitirá dotar ao ámbito de todos os servizos necesarios: saneamento, abastecemento, pluviais, redes de iluminación, de gas e de telecomunicacións, todo integrado no sistema viario definido.
Prazos
Tras a aprobación inicial do PIA o pasado luns no Consello da Xunta e da publicación hoxe no Diario Oficial de Galicia, ábrese un prazo de 15 días para a presentación de alegacións.
O siguiente paso será a análise dos informes sectoriais que xa se están a solicitar. A previsión é que o PIA conte coa aprobación definitiva este ano, para licitar a obra de urbanización no vindeiro ano 2027. Tamén se espera que no 2028 se poidan simultanear as obras de urbanización e de edificación.
Vivenda en Santiago
Ademais de desenvolver este solo residencial, a Xunta ten en marcha en Santiago 60 vivendas públicas en Lamas de Abade e O Castiñeiriño, así como 60 aloxamentos compartidos en Xoán XXIII. Tamén se desenvolverán máis vivendas públicas en Salgueiriños e en Volta de Castro, grazas á modificación normativa que se fixo para construír en solos dotacionais en desuso, coa futura construción de 244 e 36 novas vivendas públicas, respectivamente.